Hulanda ta nenga di a menaza di stop yudansa di corona na Aruba

DEN HAAG — Gobierno Hulandes ta nenga cu durante pandemia di corona el a menaza di stop yudansa financiero na Aruba pa motibo di e porcentahe abou di vacunacion contra COVID-19. Esaki ta surgi for di contestanan di minister Sterk riba preguntanan parlamentario, segun e website dossierkoninkrijksrelaties.nl.

E preguntanan a surgi despues cu director di hospital di Aruba, Jacco Vroegop, a declara cu e anterior secretario di estado Blokhuis lo a haci un menaza asina. Parlamentario Van Houwelingen di partido FvD a pidi gobierno Hulandes pa aclara e asunto.

Minister Sterk ta rechasa e acusacion y ta sostene cu durante henter pandemia Hulanda a mantene un colaboracion constructivo cu autoridadnan y personal medico di Aruba.

Sinembargo, minister no por identifica e reunion specifico na unda Vroegop ta sostene cu e menaza lo a wordo haci. Pesei, gobierno tampoco a entrega agenda ni notulen di e reunion menciona.