CAFt: Aruba a mehora, pero ainda no ta prepara pa otro crisis

ORANJESTAD — Finansa publico di Aruba ta mehorando di berdad y debe publico ta bahando rapidamente, pero e pais ainda no tin suficiente espacio financiero pa enfrenta un siguiente crisis internacional sin por tin cu bolbe fia fuertemente. Esey ta e evaluacion di Hans Hoogervorst, presidente di College Aruba financieel toezicht (CAft), den un entrevista cu Tito Laclé di Noticiacla recientemente. Hoogervorst a rechasa e idea cu e cifranan positivo di presupuesto ta presenta un imagen demasiado bunita di e situacion financiero. Segun e, tanto e gobierno anterior como e actual a mustra disciplina den e uso di e entradanan adicional. “Tanto e gobierno anterior como e gobierno actual a resisti e tentacion di gasta riba gran escala e placa extra cu a drenta. Nan a haci algun gasto, pero dentro di limite. Esaki ta merece un compliment,” el a declara.

EVALUACION POSITIVO CU CONDICION IMPORTANTE

Sinembargo, su evaluacion positivo ta bin cu un condicion importante: Aruba mester sostene e disciplina aki pa varios aña mas pa fortifica su posicion. “Nos no ta ey ainda. E debe publico ainda ta halto, pero awor e ta bahando realmente rapido.”

INTERES TA SIGUI CARGA PRESUPUESTO

Durante e entrevista, Laclé a presenta e proyeccion presupuestario cu ta pone e debe publico na aproximadamente 4,6 mil miyon florin pa fin di 2027. El a señala tambe cu cerca di 15 cen di cada florin di entrada ta bay na pago di interes. Hoogervorst a reconoce cu, apesar di e reduccion rapido di debe, e carga di interes ta sigui kita gobierno un cantidad considerable di placa. “Ainda hopi placa ta bay na pago di interes. Esey ta un lastima. Si logra reduci e debe publico mas leu, esey lo ta un impulso enorme,” el a bisa.

REFINANCIA DEBE

Riba e pregunta cuanto Aruba por spaar si e por refinancia su debenan na condicionnan mas favorabel mediante e posibilidadnan den e regulacion nobo pa finansa publico sostenibel, Hoogervorst a indica cu e besparing por subi te 60 miyon pa aña. E no a presenta un calculo cumulativo durante e entrevista, ni un fecha pa alcanza e suma ey. Su mensahe tabata cu e beneficio potencial ta suficientemente grandi pa mere­ce un evaluacion serio. “Ta trata di hopi placa, algo cu mester wordo mira masha seriamente.”

“AINDA NO” TIN SUFICIENTE RESERVA

E contesta mas directo a bin ora Laclé a puntra si Aruba a acumula suficiente espacio financiero pa absorba un siguiente crisis economico internacional sin bolbe fia fuertemente. “Ainda no,” Hoogervorst a contesta. El a splica cu hasta un pais cu a paga henter su debe por tin cu fia den un crisis. E diferencia ta e posicion financiero cu e pais tin prome cu e crisis cuminsa. Si e debe ta abou, un prestamo adicional ta mas manehabel. Si debe ta halto caba, un golpe economico por crea un problema mucho mas grandi. “Nos ta awor na aproximadamente 70%. Si bo bay den direccion di 40%, y esey por pasa bastante rapido, bo ta den un posicion mucho miho,” el a declara, refiriendo na e proporcion di debe publico compara cu e economia. Hoogervorst no a duna un fecha pa alcanza e nivel ey. El a enfatisa cu e evolucion di economia mundial ta keda un factor cu Aruba no por controla.

MENOS SUPERVISION POR BIN MAS LIHE

E progreso financiero ta habri perspectiva tambe pa un futuro cu menos supervision externo intensivo. Segun Hoogervorst, e momento ey por yega mas pronto cu CAft tabata considera posibel tres aña pasa. “Si sigui manera awor y no tin accidente grandi, e momento ey por yega mas pronto cu nos por a pensa tres aña pasa,” el a bisa. Pero e no a compromete su mes na un aña specifico. Un crisis internacional por cambia e panorama, y e capacidad di Aruba pa absorbe un golpe asina lo ta importante den cualkier evaluacion futuro.

“MI TA HAYA CU ARUBA A LOGRA GRAN PROGRESO.”

Pa e contribuyente, sinembargo, Hoogervorst no a traduci e progreso den un suma concreto of un fecha pa alivio financiero. Ora Laclé a pidi un ehempel directo di loke e mehoracion ta nifica pa e ciudadano, el a señala cu e futuro ta demasiado impredecibel pa duna e garantia ey. “Cuater aña pasa nos no por a pronostica cu Aruba lo tabata para manera e ta para awor.”