Prome shoco jong di temporada descubri den Shoco Sanctuary

ORANJESTAD — Aruba Birdlife Conservation (ABC) a anuncia cu e prome shoco jong di e temporada di cria nobo a wordo descubri den Shoco Sanctuary. Elizabeth Filipelli, di Duval Audubon Society, a mira e pichon na entrada di un nesto artificial bou di tera.

E descubrimento ta mustra cu e shoconan ta uza e nestonan artificial cu ABC ta instala pa yuda protegi nan. E shoco ta un especie protegi cu ta biba solamente na Aruba y ta enfrenta menasa door di perdida di habitat, cacho y pushi los y boa.

ABC ta pidi habitantenan y turistanan pa mantene distancia di e nestonan y no stroba e parhanan. E pichonnan tin mester di tranquilidad y un ambiente sigur pa sobrevivi.