Ponson (CUA): Gobierno mester baha su propio costonan pa alivia pueblo

ORANJESTAD — Presidente di Comerciantenan Uni di Aruba (CUA), Frans Ponson, ta considera cu Gobierno mester revisa e carganan cu e mes ta pone riba necesidadnan basico, prome cu sigui pone responsabilidad pa costo di bida riba comercio. Durante un conferencia di prensa diamars mainta, el a relaciona e debate tocante bestaansminimum — e entrada minimo necesario pa cubri gastonan esencial — cu impuesto y prijs di servicionan basico.

Ponson a menciona coriente, awa, gasolina y internet como necesidadnan di comunidad. Segun e, Gobierno tin un papel importante den e costonan aki mediante empresanan estatal y impuesto, y mester contribui directamente na alivio pa ciudadano. “Si bo kier yuda pueblo, haci bo mes un canasta basico cu un bon prijs,” Ponson a expresa.

GASOLINA COMO EHEMPEL

Pa ilustra su argumento, Ponson a presenta un calculo di prijs di gasolin, usando un prijs di compra di Afl. 2,50 pa liter y un prijs di benta di Afl. 2,91. Segun su calculo, e parti cu ta bay pa Gobierno y e empresa estatal, incluyendo impuesto, ta representa rond di 40% di e prijs final, mientras e margen di e gasolinera ta rond di 7,3%.

E cifranan aki ta calculonan presenta pa Ponson. E margen di e gasolinera no ta mescos cu ganashi neto, pasobra ainda tin gastonan di operacion cu mester wordo cubri.

Ponson a critica loke e ta considera un trato desigual: comercio ta enfrenta competencia y gastonan diario, mientras Gobierno ta ricibi entrada di impuesto y di su empresanan.

PRIJS MAS HALTO TA TRECE MAS IMPUESTO

Ponson a argumenta cu ora prijs subi, entrada di Gobierno di impuestonan calcula como porcentahe tambe ta aumenta. “Ora un prijs subi na Aruba, ken ta gana mas? Gobierno,” el a declara.

Segun e presidente di CUA, no ta suficiente pa Gobierno papia di surplus financiero of proteccion di poder di compra, mientras e carganan riba necesidadnan basico ta sigui afecta ciudadano y comercio.

El a pidi estudionan serio tocante e impacto di aumentonan di salario minimo y otro medida relaciona cu bestaansminimum, y un relacion di colaboracion cu sector comercial. Su frustracion cu e relacion actual tabata cla: “No ta un partner, ta un enemigo.”

E mensahe central di Ponson ta cu alivio di costo di bida mester ta un responsabilidad comparti, den cual Gobierno tambe ta revisa su propio impuesto, tarifanan y exigencianan.