Aruba, Corsou y Sint Maarten ta exigi proteccion contra dominio di Hulanda

ORANJESTAD — Aruba, Corsou y Sint Maarten ta trahando hunto riba un regeling nobo pa resolve desacuerdonan den Reino Hulandes. E tres paisnan ta insisti cu e procedimiento mester ta independiente y husto, pa proteha nan contra e posicion dominante di Hulanda. Asina e portal nu.cw ta raporta. 

Durante un reunion tripartito e siman aki, e paisnan a discuti e desigualdad di poder den Rijksministerraad, caminda Hulanda tin mayoria di minister, compara cu tres minister plenipotenciario di e paisnan Caribeño.

Segun parlamentario Quincy Girigorie (PAR) di Corsou, e regeling mester garantisa cu e paisnan Caribeño por defende nan derecho sin keda someti na decisionnan unilateral di Hulanda.

Na 2019, e tres paisnan a rechasa un proposicion similar, pasobra Hulanda ainda por a ignora conseho di Raad van State.

Awor nan ta busca un sistema mas efectivo, cu garantianan di independencia y proteccion igual pa tur pais den Reino.

E asunto lo forma parti tambe di preparacion pa e proximo Interparlementair Koninkrijksoverleg (IPKO), programa pa januari na Sint Maarten.