Schwengle ta pone finansa, pobreza y clima di Aruba riba mesa na Eerste Kamer

DEN HAAG — Minister Plenipotenciario di Aruba, Mildred Schwengle, a tene un encuentro cu presidente di Eerste Kamer, Mei Li Vos, unda nan no solamente a cera conoci cu otro, sino tambe a papia tocante varios reto importante cu Aruba ta enfrenta.

Entre e temanan cu a wordo trata tabata situacion financiero di Aruba, e combate contra pobreza, reparticion di prosperidad y bienestar, turismo, enseñansa y e costonan relaciona cu cambio climatico.

E conversacion a pone enfasis riba e presion cu varios di e temanan aki ta pone riba Aruba como isla chikito, specialmente den area di finansa publico, costo di bida, desaroyo social y adaptacion na cambio climatico.

E encuentro ta forma parti di e contacto politico entre Aruba y institucionnan di Reino na Den Haag.