Starlink ta haya luz berde pa opera na Corsou

WILLEMSTAD — Starlink a haya luz berde pa drenta e mercado di telecomunicacion na Corsou, despues cu e concesion oficial a wordo firma diaranson. Segun informacion anterior, e servicio di internet via satelite por ta operacional dentro di un maximo di 30 dia.

Minister Charles Cooper a indica cu entrada di Starlink lo por trece mas competencia y mas opcion pa consumidor. E compania, parti di SpaceX, lo mester cumpli cu e mesun ley y reglamentacion local cu otro proveedor di telecomunicacion, incluyendo impuesto, derecho di importacion y obligacionnan legal.

Tambe a papia tocante posible uso di Starlink durante calamidad, den educacion y salud, y pa wifi publico den centro di Willemstad.

Segun Cooper, Starlink ta mira Corsou como un lugar strategico pa su infraestructura y desaroyo di datacenter, aunke ainda no ta conoci concretamente kico e compania tin planea.