Ombudsman ta investiga holor y calidad di aire rond Parkietenbos

ORANJESTAD — Ombudsman Jurima Bryson a inicia un investigacion formal y amplio riba kehonan persistente di holor y calidad di aire den Parkietenbos y varios bario den cercania, incluyendo Mahuma, Buena Vista, Simeon Antonio, Bucutiweg y Wayaca.

E investigacion a cuminsa despues di un keho di un organisacion cu ta representa interes di habitantenan, combina cu preocupacionnan cu Ombudsman ya tabata conoci.

Lo examina entre otro calidad di aire, posible efecto riba salud y ambiente di biba, y con Gobierno a trata notificacionnan y kehonan di residentenan. Varios ministerio, AWSS, CMO, DNM y DVG a wordo contacta formalmente.

Ombudsman a habri un OMBOX special riba www.ombudsman.aw pa habitantenan, empresanan y organisacionnan por comparti experiencia y informacion.

Despues di conclui e investigacion, Ombudsman lo publica un rapport cu resultadonan, conclusionnan y, si ta necesario, recomendacionnan.