Gobierno ta anuncia inversion na Seroe Colorado, pero residentenan no ta contento

ORANJESTAD — Gobierno a inicia un proyecto di casi Afl. 3 miyon pa renoba mas di 3.5 kilometer di caminda den Seroe Colorado, cu sosten financiero di Aruba Tourism Authority (ATA). Mientras Gobierno ta presenta e obra como un inversion den infrastructura, comunidad y turismo, residentenan ta bisa cu varios di nan preocupacionnan principal ainda no ta wordo atende.

Segun Minister di Turismo Wendrick Cicilia, e proyecto lo wordo ehecuta den tres fase y mester termina pa 23 di december 2026. Gobierno ta indica cu despues lo atende tambe iluminacion di e caminda.

Habitantenan cu a contacta Noticiacla ta bisa cu nan no a wordo informa previamente tocante e trabounan. Segun nan, e pida(nan) cu ta haya asfalt nobo no tabata e parti mas deteriora, mientras cu camindanan interno, unda residentenan ta biba, ainda tin problema y falta di acera sigur.

Nan ta señala tambe cu e ruta actual ta practicamente e unico acceso asfalta pa e area. Un otro preocupacion ta un curva peligroso entre Kaminis y Anchor y e falta di un segundo acceso cu por sirbi, entre otro, den caso di emergencia.

Iluminacion ta un otro punto. Residentenan ta informa cu dos poste di palo di ELMAR a cai recientemente y ta señala cu tin mantenemento atrasa den e area.

Durante e trabounan, nan ta spera tambe incomodidad pa aproximadamente 12 siman, incluyendo uso di un caminda di santo.

E contraste ta cla: Gobierno ta enfoca riba e inversion den e ruta principal y e producto turistico, mientras cu residentenan ta pidi un enfoke mas amplio cu ta inclui camindanan interno, iluminacion, seguridad y acceso alternativo.