DVG ta ofrece vacuna contra influenza den varios bario

ORANJESTAD — Directie Volksgezondheid (DVG), den colaboracion cu CMO, lo ofrece vacuna contra influenza den varios bario entre 20 y 23 di october 2026, di 8:30 pa 11:30 di mainta.

E bus di vacunacion lo ta na IMSAN dia 20 di october, Centro di Bario Playa Pabao dia 21, Centro Deportivo Santa Cruz dia 22 y Stadion Frans Figaroa dia 23.

Vacunacion ta specialmente recomenda pa personanan di 60 aña of mas, hende cu riesgo medico, personanan cu sistema inmunologico debil, cierto hende mujer na estado, trahadornan di cuido y personanan inmobil na cama.

Personanan di 60 aña of mas por haya e vacuna gratis cu nan carchi di AZV. Personanan bou di 60 aña den grupo di riesgo mester trece carchi di AZV y recept di dokter. Otro personanan por cumpra e vacuna pa Afl. 20 na Seccion di Malesanan Infeccioso di DVG.

DVG ta enfatisa cu influenza por causa complicacion serio,  specialmente cerca personanan vulnerabel.