Famia ta cuestiona maneho di abogadonan y ta exige transparencia den caso Fernandez Pedra

ORANJESTAD — Alex Matthew, representante di famia di S. Fernandez Pedra, a expresa preocupacion serio tocante manera Ministerio Publico y Corte a maneha asistencia legal den e caso penal rond di e accidente fatal cu a costa bida di dos persona. Durante un conferencia di prensa dialuna mainta, Matthew a sostene cu nomber di por lo menos dos abogado di Corsou a wordo relaciona cu e caso sin cu, segun  e, nan tabata na altura of a duna consentimiento pa tuma e caso.

ABOGADO ZAHEDI

Un declaracion di abogado Zahedi di Corsou, cu Matthew a presenta den contexto di su acusacion, ta agrega un elemento importante na e discusion. Den e grabacion, Zahedi ta indica cu nunca nan a yam'e pa puntr'e si e tabata dispuesto pa tuma e caso “Nunca nan a yama mi. Nunca nan a puntra mi: ‘Bo ta dispuesto pa tuma e caso?’” Zahedi ta bisa den e grabacion. Segun e abogado, e no a acepta simplemente pa tuma un caso na Aruba. E ta indica tambe cu, si e lo participa den un caso na Aruba, esaki normalmente lo requeri coordinacion cu un colega abogado na Aruba. Su declaracion ta pone pregunta adicional tocante con su nomber a yega wordo relaciona cu representacion di Fernandez Pedra. Matthew ta pidi mas transparencia den henter e proceso, incluyendo grabacion oficial di sesionnan di Corte, acceso completo na dossier pa defensa y un reconstruccion tecnico di e accidente.

Segun Matthew, e problema di representacion legal a cuminsa desde juli, ora Fernandez Pedra a presenta dilanti Corte sin abogado y a pidi asistencia legal. Despues, e caso a wordo programa pa 20 di augustus, pero segun famia ainda no tabatin un abogado cu efectivamente tabata preparando su defensa.

DOS ABOGADO DI CORSOU

Matthew a relata cu durante e sesion di 20 di augustus a wordo indica cu dos abogado di Corsou tabata disponibel pa asumi e caso. Segun e, sinembargo, e dos abogadonan nunca a tuma contacto cu Fernandez Pedra.

E declaracion di Zahedi ta importante den e contexto aki. E abogado ta bisa den e grabacion cu nunca nan a acerc'e pa puntr'e si e ta dispuesto pa representa Fernandez Pedra. “Nunca nan a avisa mi,” e ta bisa, agregando cu e no tabata dispuesto simplemente pa acepta e caso sin e proceso necesario. Tocante e otro abogado menciona, Matthew ta sostene cu igualmente tabatin falta di claridad si e realmente a acepta e caso. “Nan a bisa cu tin dos abogado, pero e dos abogadonan nunca a tuma contacto cu Shania,” Matthew a declara.

E representante di famia ta cuestiona con nombernan di abogado por aparece posteriormente den decisionnan of documentonan si, segun e, durante e sesion no a wordo establece claramente cu nan oficialmente a acepta representacion di Fernandez Pedra.

Matthew ta conecta esaki directamente cu su demanda pa sesionnan di Corte wordo registra. Segun e, famia a constata diferencia entre loke nan ta recorda a wordo bisa durante Corte y loke despues a aparece den proces-verbal. “Nos mester tin grabacion den Corte, sikiera audio,” Matthew a bisa, pa despues por verifica exactamente kico huez, fiscal, sospechoso y abogado a declara.

TERCER ABOGADO MENOS CU 24 ORA PROME

Matthew a relata cu dia 1 di october, menos cu 24 ora prome cu e siguiente sesion di Corte, un tercer abogado a tuma contacto cu Fernandez Pedra via videoconferencia.

Segun Matthew, e abogado a indica cu Ministerio Publico ya a manda e dossier na dje y cu e tabata dispuesto pa trata e caso e siguiente dia. Esaki a lanta mas pregunta pa famia. “Un abogado no tin suficiente tempo pa lesa tur e cos ey den un dia. Nunca,” Matthew a sostene.

Segun e, Fernandez Pedra no tabata conoce e abogado anteriormente y tampoco e mes a scoge e abogado. Famia ta rechasa p’esey e impresion cu Fernandez Pedra simplemente no kier asistencia legal.

Matthew ta sostene cu loke Fernandez Pedra ta pidi ta un abogado cu tin suficiente tempo pa lesa henter e dossier, papia cu su cliente, determina cua investigacion adicional ta necesario y prepara un defensa adecuado.

FAMIA TA PIDI RECONSTRUCCION COMPLETO

Un otro punto central ta e demanda pa un reconstruccion tecnico completo di e accidente.

Matthew ta sostene cu tin aspectonan den dossier policial cu mester wordo revisa, incluyendo calculacionnan tocante velocidad. E a menciona un calculacion cu, segun su interpretacion di e documentonan, lo por produci un resultado irrealista di aproximadamente 375 kilometer pa ora.

Matthew no a presenta esaki como velocidad real di Fernandez Pedra, sino como ehempel di un calculacion cu, segun dje, demuestra pakico e evidencia tecnico mester wordo controla mas profundamente.

E ta pidi pa un reconstruccion examina velocidad, momento di frena, visibilidad durante anochi, posicion y movimiento di e peatonnan, imagen di video y dato electronico di e vehiculo.

Segun Matthew, informacion for di e “black box” of computadora interno di e auto por contribui pa determina na ki momento a frena y con e vehiculo tabata move inmediatamente prome cu impacto. “Bo mester mira video, black box, tempo, velocidad, visibilidad y con e personanan a cruza caminda. E ora bo por reconstrui exactamente kico a pasa,” Matthew a declara.

Segun e, defensa mester haya oportunidad pa presenta e peticionnan di investigacion aki prome cu e caso wordo trata di fondo.

ACUSACIONNAN FUERTE CONTRA MINISTERIO PUBLICO

Durante e conferencia di prensa, Matthew a expresa sospecha cu tin cosnan ta pasa “tras di cortina” den e caso.

Riba pregunta directo di prensa si e ta sospecha complicidad of algun acuerdo entre Ministerio Publico y juez, Matthew a indica cu personalmente e ta convenci cu algo no ta cuadra.

Matthew no a presenta prueba independiente durante e conferencia cu ta establece cu un complot of manipulacion realmente a tuma luga. E acusacionnan ta p’esey su propio sospecha y posicion como representante di famia.

Den e contexto aki, Matthew a señala tambe cu critica contra Ministerio Publico no ta limita na dje. E la referi na parlamentario y politico local di diferente partidonan — incluyendo MEP, AVP y partidonan relaciona cu Gobierno actual — cu, segun e, den otro ocasionnan a acusa Ministerio Publico di corrupcion of a cuestiona su actuacion. “E no ta Alex Matthew so ta bisa esaki. Tin parlamentario y politico cu ta papia di corrupcion den Ministerio Publico,” Matthew a declara.

E no a specifica durante e conferencia exactamente na cua declaracion di cada politico e tabata referi. E referencia na e declaracionnan politico tampoco ta constitui prueba di irregularidad den e caso Fernandez Pedra.

“NOS NO TA PIDI PA LAGA E SCAPA”

Matthew a enfatisa cu famia no ta pidi pa Fernandez Pedra evita responsabilidad si finalmente Corte hay’e culpabel. “Si e haya un castigo, e mester cumpli cu su castigo. Pero dun’e un oportunidad hustu pa defende su mes,” Matthew a declara. Segun  e, e demanda principal ta cu Fernandez Pedra haya representacion legal cu suficiente tempo pa prepara, cu defensa por solicita investigacion adicional y cu e procedimiento judicial wordo registra pa por verifica despues exactamente loke a pasa.

Matthew ta sostene cu esaki ta particularmente importante den un caso cu a costa bida di dos persona y cu tin un impacto grandi riba comunidad.

E caso ta programa pa bolbe dilanti Corte dia 4 di november. Matthew ta cuestiona si un tratamento di fondo na e fecha ey ta realistico si defensa ainda mester haya un abogado cu por studia completamente e dossier y presenta peticionnan di investigacion.