Rey Willem-Alexander: investigacion riba rol di Cas Oranje den colonialismo ta “doloroso y confrontante”

DEN HAAG — Rey Willem-Alexander a califica como “doloroso y confrontante” e resultadonan di un investigacion riba e rol di Cas Oranje-Nassau den pasado colonial di Hulanda.

Durante entrega di e informe, e Rey a bisa cu e conclusionnan a toca e profundamente. Segun e investigacion, miembronan di Cas Oranje a sostene colonialismo durante siglonan y a beneficia financieramente di dje. Mes mesun tempo, e estudio ta conclui cu nan influencia directo riba politica colonial hulandes tabata limita.

E investigacion ta indica cu te cu entrada di Reina Juliana na 1948, Cas Oranje nunca a uza su peso institucional seriamente pa trata di cambia e sistema colonial.

Willem-Alexander a enfatisa cu e investigacion mester tabata completamente independiente, cientificamente solido y accesibel pa publico. E la agradece e investigador principal, Gert Oostindie, y su team pa un investigacion cu e a califica como profundamente y rigurosamente haci.

E Rey a reconoce cu pasado no por wordo cambia, pero a bisa cu e por trata di haci un contribucion positivo na presente y futuro.