Mediathon E Brasa lo recauda fondo pa renoba Cas di Cultura

ORANJESTAD — Cas di Cultura lo organisa e Mediathon E Brasa dia 14 di november, un evento televisa di henter dia pa recauda fondo y mobilisa sosten pa renobacion di e Teatro Nacional di Aruba.

E programa lo reuni artistanan, representantenan cultural y comunidad cu presentacionnan bibo, entrevista, material di archivo y recuerdonan di e teatro. E evento ta forma parti di e campaña E Brasa, cu ta busca prepara Cas di Cultura pa futuro generacionnan di artista y publico.

Desde su apertura na 1958, Cas di Cultura a sirbi como escenario pa musico, bailarin, actor, scolnan y organisacionnan cultural. E renobacion ta busca conserva e espacio aki pa talento local y intercambio artistico.

Publico lo por contribui via telefon, transferencia bankario, medio digital y personalmente. E iniciativa Adopta-un-Stoel tambe lo forma parti di e campaña.

Mas informacion tocante artistanan, invitadonan y programacion lo wordo anuncia den e proximo simannan via e medianan social di Cas di Cultura y www.casdicultura.aw.