MEP ta pidi Gobierno splica ken a nenga buelo di Machado na Aruba

ORANJESTAD — Fraccion di MEP a manda preguntanan na Minister-President pa haya claridad tocante raportahenan cu Aruba no a concede permiso di aterrizahe na un buelo cu lo tabata transporta lider di oposicion venezolano y ganadora di Premio Nobel di Paz, María Corina Machado. Raporahenan internacional a indica cu Aruba, Corsou y Bonaire no a concede permiso pa e vuelo privado, pero ainda no ta completamente cla cua instancia a tuma e decision pa Aruba.

MEP kier sa si realmente tabatin un peticion oficial pa aterriza na Aruba, si e peticion a wordo nenga, ken a tuma e decision y riba cua base legal.

E fraccion ta pidi tambe claridad riba si tabatin consulta cu Venezuela, Hulanda, Merca of otro pais, y si algun tipo di presion diplomatico of politico a hunga un rol den e proceso.

Segun MEP, transparencia y responsabilidad ta esencial, particularmente ora ta trata di decisionnan cu por afecta posicion internacional di Aruba y su relacionnan den region.

E fraccion a indica cu como oposicion e lo sigui eherce su tarea di control pa pueblo por haya claridad completo riba loke a pasa.