Pieters(PPA): Inversion ta keda tranca door di falta di decision politico

ORANJESTAD — Parlamentario di PPA Eduard Pieters ta critica loke e ta considera falta di decision, curashi y vision di Gobierno pa facilita desaroyo y inversion den Aruba.

Durante un conferencia di prensa den centro di Oranjestad, Pieters a usa dos propiedad como ehempel: un edificio den decadencia y un otro caminda inversionistanan local a inverti miyones di florin, pero segun e, ainda ta enfrenta obstaculonan pa duna uzo adecuado na nan inversion.

Pieters ta adverti cu inversionistanan cu sigui e proceso legal no mester keda tranca te punto cu nan considera move nan capital pa otro pais. Segun e, Gobierno tin cu evita un sistema caminda esnan cu haci nan due diligence y sigui procedimiento corecto termina wordo castiga.

E parlamentario tambe ta pidi pa Aruba evalua ROPV, cu a drenta na vigor na 2021. Entre e cambionan cu PPA ta propone ta mas densidad habitacional na Oranjestad y San Nicolas, mas posibilidad pa construccion vertical y un revision di zonificacion y frontera entre area habita y naturaleza.

Segun Pieters, revitalizacion di Oranjestad tampoco por limita na Wilhelminastraat. E ta pidi un plan mas amplio cu inclui infrastructura, vivienda, inversion, actividad economico y otro cayanan y barionan den centro.

Pieters ta destaca cu ROPV ya ta contene instrumentonan legal pa Gobierno facilita cierto proyectonan cu tin balor economico, turistico, recreativo, habitacional of pa empleo, bao di condicionnan specifico.

“Aruba no tin solamente un problema di edificio den decadencia. E problema mas grandi ta ora inversionista ta cla pa construi futuro, pero Gobierno no ta cla pa dicidi,” Pieters a conclui.