Fundacion Alzheimer Aruba ta organisa charla gratis riba trastornonan frontotemporal

SAN NICOLAS — Fundacion Alzheimer Aruba lo organisa un charla educativo tocante Trastornonan Frontotemporal (FTD), como parti di e conscientisacion internacional riba e grupo di malesanan di cerebro aki.

FTD ta un grupo di trastorno cu por afecta principalmente personanan entre 45 y 65 aña y cu, segun specialista, frecuentemente por wordo mal diagnostica of no reconoci na tempo. E fundacion ta enfatisa importancia di mas informacion y conscientisacion, pa asina personanan y famianan por haci e preguntanan corecto y busca un diagnosis adecua.

E charla, titula “Descubriendo e Misterionan di Trastornonan Frontotemporal”, lo conta cu participacion di Dr. Jayburtt Dijkhoff, representando Pashentnan di Aruba, y Drs. Melva Croes-Yánez, representando Fundacion Alzheimer Aruba. Tambe lo trata derechonan di pashent y kico por spera ora e derechonan aki wordo viola.

E actividad ta tuma lugar diaranson 30 di september 2026, di 7:00 PM pa 9:00 PM, na Biblioteca Nacional San Nicolas. Entrada ta completamente gratis.

Fundacion Alzheimer Aruba ta invita cuidadornan, profesionalnan di salud, studiantenan y publico en general pa participa.