DAS: Sosten pa articulo di scol ta subi cu 50 florin pa aña escolar 2026

ORANJESTAD — Departamento di Asunto Social (DAS) a informa diabierna cu desde 1 di september 2026 e suma di sosten pa articulo di scol a aumenta cu 50 florin.

Cada september, clientenan cu entrega nan declaracion di scol na tempo por ricibi 300 florin, te un maximo di 1.100 florin pa famia.

Segun DAS, 378 declaracion di scol a wordo entrega na tempo y e clientenan concerni ya a ricibi e aumento e aña aki. Ademas, seccion Guia Social a brinda apoyo na 261 mucha y hoben cu recursonan necesario pa scol.

DAS ta indica cu e medida ta forma parti di su esfuerzo pa sostene famianan na momentonan cu nan tin mas necesidad.