Acuerdo cu Merca ta trece alivio, pero Groenland ainda tin duda

NUUK — Groenland y Dinamarca a reacciona cu alivio despues cu Merca a bandona su menaza di anexa Groenland. E acuerdo firma pa presidente Donald Trump, premier danes Mette Frederiksen y premier groenlandes Jens-Frederik Nielsen ta permit un presencia militar mericano mas grandi riba e isla.

Groenland ta considera   cu su derecho di autodeterminacion ta establece formalmente como un victoria y cu su Gobierno a participa directamente den tur negociacion. Segun Nielsen, no ta trata di un acuerdo “tocante Groenland”, sino un acuerdo “cu Groenland”.

E crisis tambe a acerca Dinamarca y Groenland, mientras e cooperacion entre ambos durante e negociacionnan a fortalece respeto mutuo.

Sinembargo, ainda tin preocupacion. Parlamento di Dinamarca y esun di Groenland ainda mester aproba e acuerdo. Criticonan ta lamenta cu e texto no ta declara explicitamente cu Merca a renuncia definitivamente na su ambicion di controla Groenland.

Na Narsarsuaq, unda Merca lo construi un base militar nobo, habitantenan ta mira oportunidad di trabou, pero nan ta teme tambe cu e proyecto por obliga nan laga nan comunidad. Nielsen a reconoce cu confianza den Merca mester wordo restableci paso pa paso.