Wever kier mas alimento for di Republica Dominicana pa reduci vulnerabilidad di Aruba

ORANJESTAD — Gobierno ta explorando un relacion agrocomercial mas directo cu Republica Dominicana pa amplia e cantidad di proveedor di alimento pa Aruba y reduci e isla su vulnerabilidad den cadena di suministro.

Durante un reunion na Santo Domingo, Minister di Finansa, Asuntonan Economico y Sector Primario Geoffrey Wever a discuti cu Junta Agroempresarial Dominicana (JAD) con productor y exportadornan Dominicano por conecta mas directamente cu mercado Arubano.

E enfoke ta especialmente riba producto agricola y carni cu ya ta cumpli cu standardnan internacional y cu tin capacidad pa exportacion.

Segun Wever, Aruba, como economia chikito y altamente dependiente riba importacion, mester diversifica su fuentenan di abastecemento. E meta ta pa tin mas proveedor, mas mercado y mas opcion den caso cu un parti di cadena internacional enfrenta problema.

Un punto importante ta acceso na mercado. Pa importa producto agricola y carni, condicionnan sanitario y fitosanitario mester ta cla y cumplibel. Wever a enfatisa cu empresarionan mester sa exactamente cua requisito y documentacion ta necesario pa por exporta Aruba.

Logistica ta otro reto. Actualmente tin un conexion maritimo semanal entre Republica Dominicana y Aruba via Corsou. Pa por crea un flujo mas constante di alimento, capacidad pa carga refrigerado, consolidacion di carga y entrega confiabel ta esencial.

JAD por yuda identifica productor Dominicano cu ta realmente prepara pa exporta y facilita contacto directo cu comprador Arubano.

Wever ta mira e proyecto como parti di un estrategia mas amplio cu ta conecta productor, mercado, transporte y regulacion.

“Nos meta ta pa Aruba tin mas opcion y menos vulnerabilidad,” e minister a declara.