Pieters(PPA): Gobierno mester ehecuta ROPV y regla acceso na Noordkust

ORANJESTAD — Parlamentario di PPA Eduard Pieters ta sostene cu, despues cu Parlamento a logra consenso tocante situacion na Noordkust, Gobierno awor mester actua y ehecuta e ley cu ya ta vigente.

Segun Pieters, e discusion no ta solamente tocante ATV y UTV, sino tocante obligacion di Gobierno pa cumpli cu e Ruimtelijk Ontwikkelingsplan met Voorschriften (ROPV), AB 2021 no. 123, cu a drenta na vigor dia 1 di september 2021.

Pieters ta argumenta cu ROPV no ta establece un prohibicion general pa ATV, UTV of tur vehiculo motorisa den area natural. Segun dje, Gobierno mester establece condicionnan cla, manera ruta determina, velocidad, nivel di ruido, cantidad di vehiculo y proteccion special pa area sensibel.

“Bo mester bin cu e reglanan,” Pieters a enfatisa.

E parlamentario di PPA ta critica tanto gobierno anterior como actual pa no a completa e regulacion necesario desde 2021. Segun e, e discusion politico di ken tin culpa no ta resolve e problema.

Pieters a subraya tambe cu acceso na Noordkust ta toca mas cu sector di turismo. Piscadonan, famianan, deportistanan y servicio di emergencia tambe ta depende di acceso na e area.

Su yamada na Gobierno ta pa sinta cu stakeholders, determina ruta, pone condicion, proteha naturaleza y implementa control efectivo.

“Proteha naturaleza, respeta derecho di pueblo y ehecuta e ley cu Aruba ya tin,” Pieters a declara.