Aeroparaguaná a habri ruta charter entre Las Piedras y Aruba

ORANJESTAD — Aeroparaguaná a anuncia cu awe, 9 di september, a  realiza un buelo charter riba e ruta Las Piedras – Aruba – Las Piedras cu exito, marcando segun e aerolinea e reapertura di e conexion entre Venezuela y Aruba.

E buelo a wordo opera hunto cu Consorcio Helitec. Aeroparaguaná a califica e operacion como un paso importante pa bolbe acerca famianan y crea oportunidad comercial nobo entre ambos destinacion.

Segun e aerolinea, e buelo di awe ta e prome paso den reactivacion di e ruta. Sinembargo, ainda no tin tarifa, itinerario ni frecuencia definitivo anuncia. Aeroparaguaná a indica cu e ta den proceso di defini prijsnan, horario y otro condicionnan operacional.

E compania ta pidi interesadonan pa sigui su canalnan oficial pa informacion adicional ora e detayenan ta confirma.

Cu e buelo di awe, ta bolbe habri posibilidad pa un conexion aereo directo entre Las Piedras, den estado Falcón, y Aruba, aunke pa awor e ta trata di operacion charter y no ainda di un servicio regular anuncia.