MEP ta pidi claridad riba posibel Afl. 26,1 miyon costo extra pa AZV

ORANJESTAD — Fraccion MEP a haci preguntanan na Minister di Salud Publico, Mervin Wyatt-Ras, tocante e posibel impacto financiero di regularisacion di trahadonan sin documentacion riba AZV.

Segun un calculacion indicativo den Economic Outlook di Centrale Bank di Aruba, si aproximadamente 5.800 persona regularisa bira asegurado nobo di AZV, esaki por representa cerca di Afl. 26,1 miyon na costo adicional di salud pa aña.

MEP kier sa si AZV tin capacidad financiero pa carga e costo structural aki, ken eventualmente lo paga e diferencia y con e gasto adicional ta compara cu entrada extra di prima y otro contribucion.

Fraccion MEP ta pidi tambe pa Minister splica cua medida Gobierno ta contempla pa evita cu e costo adicional pone presion riba fondo di AZV y afecta calidad of accesibilidad di cuido. E fraccion ta spera contestacion dentro di tres siman.