Herdé: ir. Roland Croes ta keda director di SETAR N.V.

ORANJESTAD  - Minister di Vivienda, Infrastructura, Servicio Interno y Telecomunicacion Rene Herdé a indica cu durante e ultimo dianan a tene diferente conversacion cu partidonan concerni, incluyendo actual director di SETAR, ir. Roland Croes, Raad van Commissarissen y sindicato STT.

Segun Minister Herdé, SETAR ta un compania solido cu ta brinda un servicio esencial na comunidad y cu, na mes momento, tin oportunidad pa sigui crece y expande den un forma robusto pa futuro di Aruba.

E proceso actual ta relaciona cu e hecho cu ir. Roland Croes ta acercando edad di pension. Den e cuadro ey, Gobierno a inicia combersacion pa evalua tanto continuidad di liderazgo como e direccion cu e compania mester sigui despues.

“E punto central pa nos ta garantisa continuidad y exito di SETAR, tambe mirando mas leu cu e periodo actual,” Minister Herdé a expresa.

Como parti di e proceso, Minister a reuni tambe cu representacion sindical y a tene intercambio cu Raad van Commissarissen. Segun Herdé, Gobierno a analisa e recomendacion y proposicionnan presenta, pa despues a determina e siguiente paso.

Minister Herdé a indica cu Gobierno a tuma e tempo necesario pa evalua e asunto cu responsabilidad, teniendo na cuenta tanto continuidad di SETAR como e interes di e compania y su futuro.

E reunion cu ir. Roland Croes no a limita solamente na e tema di liderazgo. Prome Minister Mike Eman y Minister Herdé a tene oportunidad tambe pa papia cu e director y conoce mas di cerca e operacion di SETAR durante un recorido den e compania.

“Nos ta papia di un compania importante pa Aruba. P’esey continuidad, stabilidad y un direccion fuerte pa futuro mester ta na centro di e decision cu nos lo tuma,” caminda ir. Roland Croes ta keda na cabes como director di SETAR N.V.