Gobierno a pidi pospone caso UTV/ATV; ABC ta opone

ORANJESTAD — E caso sumario di Aruba Birdlife Conservation (ABC) contra Gobierno di Aruba y FPNA tocante proteccion di naturalesa y uso di UTV y ATV na area natural tin chens di no sigui diahuebs manera programa. Gobierno a pidi Corte pa pospone tratamento di e caso, pero ABC a indica cu e ta opone e peticion. FPNA (Parke Arikok), di su banda, no tin obhecion contra un aplazamento.

CARTA DI ABOGADO

E informacion ta sali for di un carta fecha 8 di september 2026 di abogado Darin Crouch na Minister Rene Herdé, cu Noticiacla tin den su poder. Segun e carta, e caso originalmente tabata programa pa 28 di mei, pero despues a wordo move pa diahuebs 10 di september pa 10'or di mainta. Gobierno awor a solicita otro aplazamento y Corte a duna ABC y FPNA oportunidad pa reacciona.

E peticion ta bin den un momento cu Gobierno ta trata di busca un solucion pa e conflicto entre proteccion di naturalesa y continuidad di e sector di UTV y ATV. Durante ultimo dianan, Minister Herdé a tene reunion cu tour operators y Gobierno a indica cu lo forma un comision cu representacion amplio di e sector pa sigui busca un solucion concreto.

E tension a aumenta despues cu tour operators a protesta y blokea rotonde Las Americas, expresando preocupacion tocante cierre di ruta, continuidad di nan negoshi y empleo. Gobierno a bisa anteriormente cu e no tin intencion di elimina actividad di UTV y ATV, pero cu mester haya un solucion cu ta respeta ley y proteccion di medio ambiente.

E caso presenta pa ABC ta draai rond e argumento cu trafico di UTV, ATV y otro vehiculo motorisa ta causa daño na areanan natural vulnerabel y cu control riba uso di e areanan aki no ta suficiente. Gobierno entretanto a bin trahando riba un ruta alternativo cu DOW y DIP, tratando di combina continuidad economico cu proteccion ambiental.

E peticion pa pospone e caso ta crea otro momento di incertidumbre. Te na momento cu e carta a wordo manda, Corte ainda no a comunica su decision riba e solicitud. ABC a manifesta objecion y FPNA no a pone problema, pero finalmente ta Hues cu mester determina si e caso lo sigui diahuebs of si e lo wordo move nuevamente.

Pa sector di UTV/ATV, e decision ta importante, pasobra e proceso huridico por influencia cuanto espacio lo keda pa tours den areanan natural y bou di cua condicionnan. Pa Gobierno, e reto ta pa logra un solucion cu proteha naturalesa, duna claridad na empresanan y trahadornan y evita cu e conflicto sigui wordo defini solamente den Corte.