Gobierno: Turismo no mester sigui crece continuamente

ORANJESTAD — Gobierno di Aruba ta señala cu e meta pa turismo ya no ta crecemento continuo, sino un sector turistico mas sostenibel y den balansa cu capacidad y aspiracionnan di Aruba.

Den e discurso di Gobierno presenta pa Gobernador di Aruba Alfonso Boekhoudt na apertura di Aña Parlamentario 2026-2027, gobierno ta reconoce cu turismo lo sigui hunga un papel esencial den desaroyo economico di pais. Sinembargo, Gobierno ta marca un cambio den enfoke: calidad, sostenibilidad, participacion local y calidad di bida di habitantenan mester ta central.

E posicion ta forma parti di un vision economico mas amplio, den cual Gobierno kier crea mas oportunidad fuera di turismo, incluyendo agricultura, tecnologia financiero, economia blou, industria creativo y energia limpi.

Segun Gobierno, progreso economico mester crea prosperidad pa henter comunidad y mester wordo sinti den cada cas y cada bario. E discurso ta enfatisa cu tanten cu Aruba no logra prosperidad comparti, e trabou no ta cla.