Sindicato STT den impase cu Gobierno riba futuro direccion di SETAR

ORANJESTAD — Sindicato di trahadornan di Setar,  STT a informa cu e ta den un impase cu Gobierno di Aruba riba e funcion di director di SETAR, mientras incertidumbre ta crece tocante sucesion di actual director general Roland Croes.

Segun un mensahe di directiva di STT, despues di varios carta y comunicacion cu a bai y bin entre e sindicato y Gobierno, ainda no a logra un acuerdo. Pa motibo di e situacion, sindicato a convoca un reunion general di personal awe pa 2:30 di atardi na SETAR Sero Blanco, y a indica cu basa riba e resultado di e reunion lo determina su siguiente paso.

E conflicto ta cobra mas peso mirando cu futuro di direccion di SETAR ya tabata un tema publico. Den februari di e aña aki, Roland Croes a bisa den Noticiacla LIVE cu su plan tabata pa keda dos aña mas como director general despues di yega edad di pensioen, pero cu e prolongacion tabata depende entre otro di aprobacion di Gobierno como unico accionista, hunto cu consideracion di hunta di Comisario. E tempo ey, Croes a indica cu tur cos tabata mustra riba e  posibilidad cu e por keda dos aña mas.

Croes ta uno di e funcionarionan cu mas largo a lidera un compania estatal na Aruba. El a bira director general di SETAR na 2003 y, segun informacion publica pa Noticiacla, a acumula 23 aña den e funcion y 36 aña na e compania.

E situacion actual, sinembargo, ta mustra cu e proceso riba continuidad of reemplaso den e posicion aparentemente no a yega na un solucion cu tin sosten di tur parti. STT no a detaya den su mensahe exactamente cua ta e punto principal di desacuerdo cu Gobierno, ni kende ta e candidato of perfil cu ta causa e impase.

Pa awor, loke ta cla ta cu sindicato ta considera e asunto suficientemente serio pa reuni su miembronan y prepara un siguiente paso.

Noticiacla ta sigui e caso y ta busca mas claridad di parti di STT, Gobierno y SETAR tocante e proceso pa futuro direccion di e compania.