Gobierno kier liga salario minimo na bestaansminimum

ORANJESTAD — Gobierno di Aruba a anuncia cu den Aña Parlamentario 2026-2027 lo presenta un ley pa acopla salario minimo na bestaansminimum, cu e meta cu un persona cu ta traha no mester gana menos cu loke ta necesario pa cubri su subsistencia basico.

E anuncio a forma parti di e discurso di Gobierno presenta pa Gobernador di Aruba Alfonso Boekhoudt durante apertura oficial di Aña Parlamentario. Gobierno ta pone como principio cu salario minimo mester tene relacion directo cu e costo minimo necesario pa un persona por sostene su mes.

Segun e discurso, e cambio lo no wordo implementa sin tene cuenta cu e impacto riba empresanan. Gobierno ta indica cu e medida lo bay hunto cu sosten pa empresanan mediano y chikito, pa nan por mantene nan fortaleza mientras salario di empleadonan ta mehora.

E propuesta ta representa un di e medidanan mas concreto anuncia pa mercado laboral den e discurso di Gobierno. E Ejecutivo ta argumenta cu mercado laboral mester evoluciona hunto cu economia y cu mester tin un mihor coneccion entre educacion, capacitacion y necesidadnan di mercado laboral.