Wever-Croes(MEP): Aruba ta enfrenta crisis, pero Gobierno ta keda keto

ORANJESTAD — Lider di oposicion y parlamentario Evelyn Wever-Croes ta critica Gobierno pa, segun e, keda silencioso mientras Aruba ta enfrenta problema den naturalesa y medio ambiente, economia, turismo, husticia, enseñansa, salubridad y infrastructura.

Durante un debate publico, Wever-Croes a bisa cu e problema no ta solamente falta di accion, sino tambe falta di responsabilidad. Segun dje, Parlamento y pueblo ta mira e problemanan, pero Gobierno no ta actua.

E parlamentario a critica tambe e echo cu Gobierno no a sigui dos mocion aproba unanimemente pa Parlamento pa explora posibilidadnan den industria petrolero. Segun Wever-Croes, esaki ta mustra falta di respeto pa Parlamento.

El a conclui cu Aruba merece un Gobierno cu ta duna direccion, scucha, tuma responsabilidad y entrega resultado, y cu e pais no por normalisa silencio mientras e problemanan ta bira mas grandi.