Discurso Gobernador: Gobierno kier prosperidad comparti y salario digno

ORANJESTAD — Den e discurso di apertura di Aña Parlamentario 2026-2027, presenta pa Gobernador di Aruba, S.E. Alfonso Boekhoudt pero prepara pa Gobierno, a pone prosperidad comparti como tema central di su maneho pa e periodo venidero. E mensahe ta cu progreso economico mester yega mas directamente na ciudadano, mientras Aruba ta prepara pa futuro cu inversion, reforma social y un base financiero mas solido. Gobierno ta anuncia, segun e discurso presenta pa Gobernador,  cu lo sigui cu un maneho financiero prudente y cu lo busca pa diversifica economia cu mas actividad den agricultura, tecnologia financiero, economia blou, industria creativo y energia limpi. Turismo lo ta sigui esencial, pero e enfoke lo no ta riba crecemento continuo, sino riba calidad, sostenibilidad, participacion local y calidad di bida.

ACOPLA SALARIO MINIMO NA BESTAANSMINIMUM

Un di e anuncionan mas importante ta intencion di presenta un ley pa acopla salario minimo na bestaansminimum, cu e principio cu ningun empleado mester traha pa un salario cu no cubri su subsistencia basico. Gobierno ta bisa cu e medida lo wordo combina cu sosten pa empresanan chikito y mediano.

VIVIENDA PAGABEL

Tambe lo tin mas enfoke riba vivienda pagabel, revitalisacion di Oranjestad y San Nicolas y inversion via Fondo di Inversion. Gobierno ta menciona entre otro MFA na San Nicolas, mehoracion di bario, renovacion di scol y monumento y reforestacion como proyectonan cu ciudadano mester por mira y sinti den bida diario.

SALUD Y PROTECCION SOCIAL

Den salud y proteccion social, Gobierno ta anuncia reforma cu mas atencion pa prevencion, salud mental y cuido di prome liña. Landsverordening Langdurige Zorg mester crea un base financiero duradero pa cuido prolonga, mientras un otro ley lo duna asistencia financiero adicional na famianan cu muchanan cu necesidad special.

MEDIO AMBIENTE

Medio ambiente, seguridad y modernisacion di Gobierno ta forma otro partinan di e agenda. Gobierno ta mantene su ambicion di planta 100.000 palo, fortifica seguridad cibernetico, sigui inverti den polis, brandweer y control di frontera, y crea un Oficina di Planificacion Social, Economico y Cultural pa basa maneho mas riba dato y vision di largo plazo. E discurso, entrega den aña cu Aruba ta marca 40 aña di Status Aparte, ta presenta e siguiente fase di Gobierno como un esfuerzo pa combina crecimiento economico cu mas seguridad social, inversion y preparacion pa futuro. Pa e discurso completo, click AKI. potret cortesia Telearuba.