Cinco morto despues cu avion di carga di Amazon pasa pista na Miami

MIAMI — Un Boeing 767 di carga cu ta opera pa Amazon a pasa e final di pista despues di aterrisa na Miami International Airport y a termina riba un caminda cerca di aeropuerto, caminda e a dal contra varios vehiculo.

Segun bombero di Miami-Dade, cinco persona a perde nan bida y cinco otro a resulta herida, di cual tres seriamente. Ainda no ta cla si e personanan cu a muri tabata den e avion of den e vehiculonan.

E avion a yega Miami despues di un vuelo for di San Juan, Puerto Rico. Autoridad di aviacion FAA a informa cu e avion a pasa pista, cruza un caminda y finalmente para den un terreno di yerba.

Operacion di rescate a bira mas dificil pasobra un di e motor di avion a keda draai. Bomberonan por a acerca e aparato solamente despues di apaga e motor cu awa. Mas di 60 bombero a participa den e operacion.

Causa di e incidente ainda no ta conoci. FAA lo investiga e accidente. Aeropuerto a sera temporalmente pista y taxiwaynan, pero trafico aereo a cuminsa normalisa poco poco. Pasaheronan cu tin vuelo programa ta wordo conseha verifica status directamente cu nan aerolinea.