Tour operators a blokea rotonde Las Americas pa protesta

ORANJESTAD — E reunion entre Gobierno y representantenan di e sector di UTV/ATV a termina cu un accion di protesta, ora un grupo di tour operators a blokea e rotonde Las Americas pa demanda mas atencion pa nan preocupacionnan. Minister Rene Herdé despues a bay personalmente na e sitio y a papia cu e grupo.

E incidente a sigui un encuentro amplio entre Minister Herdé, Minister di Turismo, Transporte y Labor Wendrick Cicilia, diferente conseheronan y representantenan di e sector di tours, pa trata e situacion relaciona cu acceso y rutanan alternativo pa operacion di tours na Noordoostkust.

Durante e reunion, cu a conta cu participacion grandi di e sector, operadornan a haya espacio pa expresa nan preocupacionnan, comparti nan experiencia y presenta sugerencianan. Segun Herdé, e intercambio a transcuri den un ambiente habri y constructivo.

Gobierno a indica cu su prioridad ta pa busca un solucion lo mas pronto posibel, pero manteniendo un balansa entre continuidad di e tournan, e trabou di tourguides, cumplimiento cu ley y proteccion di naturalesa y medio ambiente.

Como parti di e siguiente paso, representantenan di UTV/ATV a acepta participa den un grupo di trabou pa sigui dialogando riba e operacion actual y futuro di e sector.

Gobierno tambe lo reuni dialuna cu Aruba Birdlife Conservation (ABC) pa explora posibilidad di un acuerdo. Si no logra yega na un entendemento, Gobierno ta prepara pa defende su posicion den Corte y despues sigui e proceso cu e tour operators pa establece acuerdonan concreto.

Na final di e encuentro, sinembargo, e tension a subi ora un grupo di tour operators a blokea e rotonde Las Americas. E accion tabata dirigi pa haya e atencion directo di e minister. Herdé finalmente a presenta su mes na e sitio y a papia cu e grupo.

Gobierno ta bisa cu lo sigui traha cu sentido di urgencia pa yega na un solucion realistico, balansa y sostenibel pa e sector.