Gregory Elias ta honra campeonan mundial di Little League durante Curaçao North Sea Jazz Festival

WILLEMSTAD — E di dos anochi di Curaçao North Sea Jazz Festival a habri cu un momento di sorpresa special y emotivo riba e tarima Sir Duke, ora Gregory Elias, e persona principal tras di festival, a sorprende publico cu un homenahe na seleccion di Little League di Corsou, reciente coronaWorld Series Little League Champions 2026.

E momento a tuma luga poco prome cu presentacion di e artista Arubiano Jeon. Elias a invita e hungadornan y representantenan di e organizacion riba tarima, unda nan a ricibi un aplauso grandi di e publico presente.

“Awor nos ta campeon mundial. Pabien!” Elias a expresa, visiblemente orguyoso, mientras e tabata presenta e mucha-hombernan como un seleccion cu a pone Corsou riba mapa mundial. El a enfatisa cu e logro no ta solamente deportivo, pero tambe un resultado di disciplina, sacrificio y trabou di un equipo tecnico dedica.

Presidente di e liga, Jacqueline Bernabela, tambe a haya oportunidad pa dirigi palabra na publico. Den su mensahe, el a pone enfasis riba e futuro di e hungadornan y riba importancia di no laga e titulo mundial bira e punto final di nan trayecto.

“Soña grandi,” tabata un di e mensahenan central. Bernabela a subraya cu, banda di baseball, e prioridad mester sigui ta educacion, scol, responsabilidad y bon comportacion. E meta, segun su mensahe, ta pa e campeonnan sigui forma nan mes no solamente como atleta, pero tambe como hoben responsabel.

E seleccion di Corsou a conkista e titulo mundial despues di enfrenta algun di e paisnan mas fuerte den baseball jubenil, entre otro Japon, Corea del Sur, Canada y e campeon di Merca. E triunfo a provoca celebracion grandi na Corsou y a transforma e ekipo den un simbolo di orguyo nacional.

E homenahe na North Sea Jazz a duna e campeonnan un otro tipo di tarima: no un veld di baseball, pero un escenario internacional di musica, caminda miles di hende a reconoce nan prestacion.

E gesto di Gregory Elias a pone un seyo local fuerte riba e festival: prome cu musica sigui, Corsou a para un momento pa celebra su campeonnan mundial.