Team di Scol Basico Dornasol ta sigui curso specialisa den autismo y comportacion

ORANJESTAD — E team di Scol Basico Dornasol a inicia un curso specialisa di un aña pa fortalece nan capacidad pa guia muchanan cu diferente necesidadnan, cu enfasis riba autismo y comportacion.

E formacion ta wordo brinda den cooperacion cu Hogeschool Windesheim y Instituto Pedagogico Arubano (IPA). Na final di e trayecto, maestronan participante lo specialisa como coach di comportacion of coach di autismo, mientras asistentenan lo haya conocemento specifico pa sostene muchanan cu autismo den ambiente escolar.

Minister di Educacion Gerlien Croes a enfatisa cu profesionalisacion continuo di personal docente ta un inversion directo den calidad di educacion y bienestar di muchanan.

Despues cu Dornasol completa e prome trayectoria, IPA lo sigui ofrece e curso pa mas maestro y asistente na Aruba, cu meta di crea mas capacidad local y fortalece educacion specialisa riba termino largo.