Pieters (PPA) ta critica falta di claridad riba futuro di Landspakket mientras HOFA ta haya prioridad

ORANJESTAD — Lider di fraccion di PPA, Eduard Pieters, ta critica Gobierno Hulandes pa falta di claridad tocante continuidad di Landspakket di Aruba, mientras segun e, si ta inverti hopi tempo y energia den Rijkswet HOFA.

Pieters a reacciona despues di un debate den Tweede Kamer, unda Secretario di Estado Hulandes pa Relacionnan den Reino no a duna un contesta concreto tocante kico lo pasa cu Landspakket despues cu e periodo actual termina.

Segun Pieters, Aruba a expresa interes pa continua cu e proceso di reforma y evaluacionnan di e cooperacion tabata positivo. P’esey, e ta cuestiona pakico no tin un direccion cla pa futuro.

E parlamentario ta enfatisa cu Landspakket mester keda un instrumento di cooperacion, caminda Aruba mes ta determina cua reformanan ta necesario, y no un sistema unda Hulanda unilateralmente ta dicta politica.

Pieters ta mira un contraste cu Rijkswet HOFA, cu segun e, ta toca autonomia y posicion constitucional di Aruba. E ta pidi Tweede Kamer pa exigi claridad di Gobierno Hulandes y ta sostene cu Relacionnan den Reino mester basa riba respet mutuo, claridad y cooperacion.