Restauracion di Cas Debrot a inicia; edificio historico lo haya funcion nobo na 2027

ORANJESTAD — E di dos fase di restauracion di Cas Debrot na Caya Betico Croes 98 a inicia dialuna 31 di augustus. E proyecto ta bou di guia di Hoevertsz ArchiDesign N.V., mientras General Property Services lo ehecuta e trabounan hunto cu diferente compania specialisa.

Ta planea pa completa e restauracion na principio di 2027. Despues, Stichting Monumentenfonds Aruba lo muda su oficina pa e piso di ariba, mientras e piso abou lo wordo huur na otro organisacion.

Monumentenfonds a cumpra Cas Debrot na 2024 for di famia Debrot y e edificio a wordo designa como monumento protegi. E restauracion ta wordo financia pa Nationaal Restauratiefonds na Hulanda y Aruba Bank.

Cas Debrot tin un historia importante den centro di Oranjestad. E cas a wordo construi alrededor di 1929 pa Jose Maria “Boy” Debrot y su esposa Elia Capriles. Durante añanan, e edificio a sirbi entre otro como residencia, tienda, oficina di Hollandsche Bank Unie, Consulado di Venezuela, Debrot Hardware Store, Nassau Shoe Shop y salon di belleza.

E edificio ta distingui pa su estilo Neo-Barok Latino-Americano y ta considera un parti importante di patrimonio arkitectonico y comercial di Oranjestad.