Menos hende ta duna cuido informal na Corsou, aumentando presion riba sistema di salud

WILLEMSTAD — E cantidad di habitante di Corsou cu ta duna cuido informal por lo menos un biaha pa siman a baha drasticamente. Mientras na 2017 mas di 20% di adultonan tabata haci esaki, na 2025 e porcentahe a cay pa apenas 7,4%.

E dato ta sali for di e resultadonan di salud di Enkuesta Sosial 2025 di CBS.

Cuido informal ta asistencia sin pago na famia, amigo of conocir cu mester yudansa pa enfermedad, edad of limitacion. Na 2025, 8,4% di muhenan y 6,1% di hombernan a indica cu nan ta duna e tipo di cuido aki semanalmente.

E grupo di 45 te 64 aña ta sigui carga e responsabilidad mas grandi, cu casi 11%. Entre personanan di 65 aña y mas e cifra ta 6,8%, mientras entre hobennan di 18 te 24 aña e ta apenas 2,6%.

CBS no ta indica un causa directo pa e bahada, pero ta adverti cu aumento di gastonan di salud, cambio den uzo di cuido y menos mantelzorgers por pone mas presion riba sistema di salud den futuro.

E preocupacion ta mas relevante pasobra mas cu mitar di poblacion di Corsou tin 45 aña of mas.