Minister Herdé ta busca solucion cu sector UTV y ATV pa acceso y ruta alternativo

ORANJESTAD — Minister di Vivienda, Infrastructura, Servicio Interno y Telecomunicacion, Rene Herdé, a invita operadornan di UTV y ATV pa un dialogo habri tocante e preocupacionnan cu a surgi riba acceso na cierto rutanan na costa norte di Aruba.

Segun e minister, Gobierno no tin intencion di stop operacionnan di UTV y ATV, ni pone empleo den e sector na peliger. E preocupacionnan a surgi despues di un caso presenta pa ABC contra Gobierno, cu ta busca pone fin na cierto tour y operacionnan di UTV y ATV.

E accion di Gobierno ta bin despues cu un grupo di operadornan a protesta publicamente e siman aki na e sitio unda acceso pa costa norte a keda blokea cu baranca.

Pa busca un solucion, DOW y DIP a traha riba un ruta alternativo cu por mantene acceso pa e sector y, na mes momento, atende e situacion legal cu a presenta.

Awe, diabierna 4 di september, di 2:00 PM pa 4:00 PM na John F. Kennedy Education Center, Minister Herdé lo reuni cu e sector durante un “Encuentro cu Minister”. Operadornan lo tin oportunidad di expresa nan preocupacionnan y sugerencianan, mientras Gobierno lo presenta informacion tocante e ruta alternativo y e pasonan cu ta tumando.

Herdé a enfatisa cu e meta ta yega na un solucion balansa y realistico, cu ta tene cuenta tanto cu continuidad di actividad economico como cu otro interesnan relaciona cu uzo di e area.