Herde: Gobierno y FCCA ta planea pa traha 300 cas den dos aña

ORANJESTAD – Gobierno ta negociando cu FCCA pa posibilita construccion di aproximadamente 300 cas den e siguiente dos aña, como un di e prome pasonan concreto pa enfrenta e crisis di vivienda na Aruba.

Minister René Herdé a revela e plan durante entrevista cu Tito Laclé den Noticiacla LIVE. E proyecto ta enfoca, entre otro, riba personanan cu tin ingreso suficiente pero cu ta haya dificultad pa drenta den e sistema tradicional di vivienda.

Herdé mes a reconoce cu 300 cas no ta suficiente compara cu e demanda existente. “Ta un cuminsamento chikito y no ta suficiente, pero nos mester cuminsa,” ta e posicion cu e minister a presenta durante e conversacion. E plan ta forma parti di un strategia mas amplio cu ta combina FCCA, terreno di Gobierno, participacion di banco y proyectonan di vivienda na escala mas grandi.