Demanda pa cas por tuma 20 aña si Aruba sigui cu ritmo actual

ORANJESTAD – Aruba ta enfrentando un atraso enorme den vivienda y, si e pais sigui construi cas na e ritmo tradicional, e por tuma cerca di 20 aña pa cubri e demanda actual. Esaki a sali na cla durante e entrevista di Minister di Obras Publico René Herdé cu Tito Laclé den e programa Noticiacla LIVE.

CIFRAS

Segun cifranan menciona durante e entrevista, Departamento di Infrastructura y Planning (DIP) tin entre 8.000 y 10.000 peticion relaciona cu tereno, mientras cu FCCA tin aproximadamente 4.000 caso cu necesidad urgente. Históricamente, Aruba a logra produci alrededor di 400 cas pa aña. Herdé a aclara cu e calculacion di 20 aña no ta nifica cu un persona necesariamente mester warda exactamente e periodo ey, pero cu, cu e capacidad actual, ta imposibel elimina e atraso rapidamente.

E minister a indica cu Gobierno kier cambia e sistema, incluyendo proyectonan mas grandi y alternativanan pa personanan cu no por financia un cas den e modelo tradicional.