Mas di 381 studiante ta cuminsa programa nobo na Universidad di Aruba

ORANJESTAD – Universidad di Aruba (UA) a marca comienso di e aña academico nobo cu su O’Days anual, organisa dia 18 y 19 di augustus pa duna bon bini na studiantenan nobo di Aruba y exterior.

Pa e aña academico aki, mas di 860 studiante a wordo admiti, mientras cu mas di 381 ta cuminsa un programa nobo. Entre nan tin mas di 42 studiante internacional di diferente paisnan den Europa.

Durante e dos dianan, e studiantenan a conoce e servicionan di sosten, biblioteca, International Office y otro departamentonan di UA. E programa tambe a inclui actividadnan social y cultural, entre otro Fox Hunt, baile cu Aruba Salsa y actividadnan den solo.

Tema di e aña ta “Your Pattern Shapes More Than You”, cu ta invita studiantenan pensa no solamente riba nan propio exito academico, pero tambe riba e impacto cu nan decisionnan, relacionnan y accionnan por tin riba e comunidad rond di nan.

UA ta mira O’Days como un manera pa yuda studiantenan sinti nan mes parti di comunidad for di e prome dia y prepara nan pa e siguiente etapa di nan desaroyo academico.