AFTA: 45 miyon florin ta sali for di Aruba pa pago cu carchi credit y debit

ORANJESTAD – Un di e asuntonan mas notable den trabou di Aruba Fair Trade Authority (AFTA) durante e prome seis lunanan di 2026 ta e costo halto relaciona cu pagonan cu debit y credit card na Aruba.

Segun investigacion publica pa AFTA, tarifanan cobra pa transaccion cu carchi na Aruba ta considerablemente mas halto cu den diferente otro mercado. Debi, entre otro, na e gran cantidad di pago cu turista ta haci cu cartanan emiti den exterior, AFTA ta calcula cu aproximadamente Afl. 45 miyon pa aña ta sali for di economia di Aruba mediante e tipo di costo aki.

E autoridad a señala cu cierto tarifanan interbancario na Aruba ta seis te shete biaha mas halto cu den mercado caminda nan ta regula. E costonan aki por termina wordo pasa pa comerciante y finalmente pa consumidor mediante prijsnan mas halto.

AFTA a recomenda legislacion pa limita e tarifanan y aumenta transparencia den costonan relaciona cu pago cu carta.

E prome mita di 2026 tambe a marca un cambio importante pa AFTA. Desde 15 di maart, e autoridad no ta supervisa solamente competencia justo, pero tambe cumplimiento di derechonan di consumidor na Aruba.

E desaroyonan aki ta forma parti di e periodo cubri den e rapportage di prome seis lunanan di 2026, cu recientemente a wordo presenta na Minister di Husticia Arthur Dowers. E minister a enfatisa importancia di transparencia, rendicion di cuenta y bon gobernacion.