Presunto cerebro tras atakenan di 9/11 lo aparece dilanti corte na 2028

NEW YORK - Khalid Sheikh Mohammed, considera e presunto cerebro tras e atakenan terrorista di 11 di september 2001 na New York y Washington, lo aparece dilanti corte na juni di 2028, mas cu 25 aña despues cu el a wordo captura na Pakistan.

Mohammed, actualmente 61 aña, ta deteni na Guantánamo Bay desde 2006. Fiscalnan mericano tabata kier cuminsa e caso na januari 2027, pero e hues a determina cu tin mester di mas tempo pa resolve diferente asunto huridico, incluyendo cua  evidencia por wordo admiti durante e proceso.

Un di e puntonan importante ta un acuerdo cu Mohammed a haci cu Departamento di Defensa di Merca. Segun e acuerdo, el lo declara culpabel a cambio di un proceso unda pena di morto no por wordo exigi. E acuerdo a causa critica fuerte entre famianan di victima di 9/11 y posteriormente un corte federal a rechaze.

Mohammed ta wordo acusa di a planea y dirigi e atakenan contra World Trade Center na New York y Pentagon na Washington. Casi 3.000 persona a perde bida despues cu cuater avion a wordo secuestra. Dos a dal World Trade Center, un a dal Pentagon y e di cuater a cay na Pennsylvania despues cu pasaheronan a purba controla e secuestradornan.