Croes: Atencion na Merca pa accidente di watersport ya a baha

ORANJESTAD – Cobertura den Merca tocante e reciente accidente di watersport na Aruba a perde intensidad y, na e momento aki, Aruba Tourism Authority (ATA) no ta mira necesidad pa un accion adicional den e mercado Mericano. Asina CEO di ATA, Ronella Croes, a declara durante un entrevista cu Noticiacla.

EFECTO DI ACCIDENTE RIBA TURISMO DI ARUBA

Durante e entrevista, Tito Laclé a puntra Croes directamente ki impacto e noticia di e accidente reciente di watersport na Aruba tabatin riba turismo y imagen di Aruba den Merca. Croes a splica cu inmediatamente despues di e incidente ATA a cuminsa monitorea con Aruba tabata wordo menciona internacionalmente, den ki contexto y cuanto cobertura e caso tabata ricibi. “Directamente nos ta activa y nos ta cuminsa monitorea,” Croes a declara. Segun e, especialmente den e prome dianan tabatin cobertura internacional considerable. Sinembargo, pa fin di siman e atencion den medio Mericano ya tabata bahando. “E cobertura a cuminsa baha,” Croes a bisa.

NO TA REKERI ATENCION ADICIONAL 

El a agrega cu, pa loke ta trata specificamente mercado Mericano, e asunto na e momento ey no tabata requeri un accion adicional di ATA. “Primordialmente esey a baha caba y no ta rekeri algo cu un accion adicional di nos na e momentonan aki. Pero nos ta sigui monitorea,” Croes a splica,

DIFERENCIA ENTRE REACCION LOCAL Y COBERTURA INTERNACIONAL

E CEO a haci un diferencia entre reaccion local, unda e accidente ainda ta genera hopi discusion, y cobertura internacional, unda interes den e caso a disminui.

Aunke e pregunta principal tabata enfoca riba impacto turistico den Merca, Croes a agrega cu seguridad den watersport ta un topico cu ya a wordo discuti durante añanan den comisionnan y cu tin recomendacionnan pendiente. Segun e, ATA ta traha cu autoridadnan y operadornan den sector, pero pa logra un solucion completo, diferente instancia mester tuma nan responsabilidad. “Pa completa e ciclo di tur loke mester wordo haci, tur cos ta bolbe na responsabilidad comparti,” Croes a enfatisa. NOTA. E potret ta crea cu AI pa acompaña e articulo.