Croes: Ruta specifico pa UTV y ATV ya a wordo recomenda, pero cambio di ley ta necesario

ORANJESTAD – Designacion di un ruta specifico pa UTV y ATV na Aruba no ta un idea nobo. CEO di Aruba Tourism Authority (ATA), Ronella Croes, a confirma na Noticiacla cu recomendacionnan den e direccion aki ya a sali for di un comision cu a trata e topico añanan pasa. Sinembargo, pa por controla unda e vehiculonan por circula y aplica cierto medida tecnologico, cambio di legislacion ta necesario.

PAKICO NO HACI INICIATIVA FOR DI ATA PA RUTA NOBO

Durante e entrevista cu Noticiacla, Tito Laclé a pone e pregunta na Croes cu, siendo cu ATA ta involucra den desaroyo y separacion di un ruta (trail) pa mountain bike y horseback riding, pakico no tuma iniciativa tambe pa stimula un ruta special pa UTV y ATV na Aruba. Croes a contesta cu e asunto di UTV y ATV ya a wordo analiza den pasado. “Nos a sinta den comision pa trata e topico di UTV y ATV. Nos a cuminsa sinta den comision mas di 10 aña pasa y nos tin e recomendacionnan cu a sali for di e comision,” Croes a declara. Segun e, un di e recomendacionnan tabata precisamente pa designa ruta specifico pa UTV y ATV.

EKIPO PA RASTREA ATV Y UTV

Pero e discusion a bai mas leu cu solamente ruta. Croes a indica cu tambe a wordo contempla e posibilidad di instala tecnologia den vehiculonan pa nan por wordo rastrea y controla ora nan drenta area cu no ta permiti. “Bo por rastrea nan, di tal manera cu si nan subi riba un trail of den area cu no ta permiti, basicamente bo por paga e vehiculo,” Croes a splica. E CEO di ATA a laga cla, sinembargo, cu pa pone un sistema asina na practica, mester tin un base legal.

MESTER CAMBIO DI LEGISLACION

“Den e parti di UTV y ATV, esaki mester cuminsa cu un cambio di legislacion,” el a bisa. E pregunta a surgi den contexto di trabou cu ATA ta haciendo pa evita conflicto entre diferente uso di e area natural. Croes a splica cu, por ehempel, ATA ta trahando pa horseback riding haya su propio ruta separa for di mountain-bike trail y cu ya a reuni varios biaha cu ranchonan pa tende nan punto di bista. Croes a señala tambe cu conscientisacion di turista ta un parti importante di e solucion. ATA ta kier fortalece comunicacion cu hotelnan, operadornan di tour, rent-a-car y otro socio den sector privado, pa nan por orienta visitante mihor prome cu nan participa den UTV, ATV, Jeep tour of otro actividad similar. “Nos lo duna nos socionan den sector privado mas instrumento pa nan por guia nos huespednan mihor,” Croes a declara. E contesta di Croes ta laga cla cu, aunke iniciativa pa crea un ruta special pa UTV y ATV no a wordo presenta den e entrevista como un proyecto nobo di ATA, e concepto mes ya ta forma parti di recomendacionnan anterior, mientras cu implementacion ta depende principalmente di legislacion y cooperacion entre Gobierno, ATA y sector priva.