Tercer edicion di In The Picture ta inicia cu 20 participante

ORANJESTAD – Minister di Salubridad, Asunto Social, Cuido di Adulto Mayor y Maneho di Adiccion, Melvin Wyatt-Ras, a declara e tercer edicion di In The Picture oficialmente habri durante un kick-off dia 20 di augustus na John F. Kennedy.

E programa ta conta cu 20 participante selecta entre clientenan di Departamento di Asunto Social (DAS) cu ta ricibi Sosten Financiero of Guia Social. E trayecto, cu ta obligatorio como parti di nan guia, lo cuminsa dia 24 di augustus y ta enfoca riba crecemento personal y profesional, desaroyo di habilidad y preparacion pa drenta   mercado laboral bek.

In The Picture ta un iniciativa di DAS, ehecuta conhuntamente cu Departamento di Progreso Laboral (DPL) bou di guia di Stichting JA-IK Aruba.

E edicion anterior a registra resultado positivo. Di 40 cliente registra na februari 2026, 19 a logra drenta mercado laboral: shete prome cu e trayecto a cuminsa y 12 durante e programa.

Wyatt-Ras a enfatisa cu e trayecto no mester wordo mira como un straf, sino como un oportunidad pa crece y logra mas independencia.