Gobierno ta prepara fundeshi pa digitalisa servicionan publico

ORANJESTAD – Gobierno di Aruba ta avansa cu plan pa modernisa su organisacion y crea un Gobierno Digital mas sostenibel, segun Minister Gerlien Croes. E meta ta pa diferente sistemanan publico por comunica cu otro, comparti informacion di forma sigur y reduci papel, retraso y duplicacion di trabou.

Como proximo paso, Gobierno ta prepara un proyecto piloto pa interconecta DIMAS, CENSO y IMPUESTO. Si e modelo funciona bon, lo amplia gradualmente pa otro departamento y servicio publico.

Actualmente ICT dentro di Gobierno ta fragmenta, cu departamento cu tin nan propio sistema, contrato, licencia y proveedor. Pa pone mas coherencia, Gobierno kier establece dos structura: un CIO-Office, responsabel pa direccion strategico, standardnan, cybersecurity, data y cloud, y un SSO-ICT, cu lo concentra riba entrega di servicionan ICT comparti, infrastructura, contractnan, proveedor y licencia.

Gobierno tin un destaho publico habri pa un Programma Manager cu lo guia e structuracion di e dos organisacionnan y coordina e cambio tecnico, organisatorio y humano. Deadline pa aplica ta 28 di augustus 2026, 23:59 AST.

Minister Croes a enfatisa cu digitalisacion no ta trata solamente di tecnologia. Gobierno ta traha cu DRH pa fortalece formacion, contratacion y retencion di talento ICT, pa reduci dependencia di proveedor externo y conserva conocemento importante internamente.

E modelo a wordo desarrolla durante un “pressure cooker” na januari 2026 cu sosten di TWO Hulanda. E meta final ta un sistema digital cu no ta depende di un solo proyecto, sistema of proveedor, pero cu Gobierno por mantene, proteha y sigui desaroya pa futuro.

Interesadonan den e destaho por participa na un sesion informativo 19 di augustus na 9:00 di mainta na Cas Veneranda, oficina di DEACI.