ArtisA ta agrega arte y bida nobo na centro di Oranjestad

ORANJESTAD – Minister di Finansa, Asunto Economico y Sector Primario, Geoffrey Wever, a atende apertura di ArtisA, un galeria di arte nobo di Tito Bolivar den edificio di ex-Aruba Bank na Caya G.F. “Betico” Croes.

Segun Wever, apertura di ArtisA ta cuadra cu e vision pa revitalisa centro di Oranjestad, creando mas motibo pa local y bishitante bin centro, aumenta movimiento di hende y genera oportunidad pa negoshinan den e area.

E minister a destaca cooperacion di Departamento di Asunto Economico, Comercio y Industria (DEZHI) y Stichting Monumentenfonds Aruba (SMFA), y importancia di duna edificionan existente un funcion nobo. E vision ta pa combina comercio, cultura, horeca, vivienda y servicio pa trece mas actividad bek den centro.

ArtisA ta agrega arte y cultura na varios otro proyecto cu ya a inicia den Oranjestad. Segun Wever, cada edificio cu haya un funcion nobo y cada negoshi of iniciativa cu habri su porta ta un paso adicional pa fortalece Oranjestad como curason economico y cultural di Aruba.