Tres negoshi local gana Aruba Signature Experience 2026

ORANJESTAD – Aruba Tourism Authority (A.T.A.) y Qredits Aruba a anuncia Cura di Mama, Moorebida y Piskechi Experience como ganadornan di e di cinco edicion di Aruba Signature Experience.

E programa ta busca fortalece y diversifica producto turistico di Aruba, apoyando empresarionan local pa desaroya experiencianan autentico relaciona cu cultura, bienestar, naturalesa y sostenibilidad.

Entre 20 participante, e tres ganadornan a sobresali pa nan creatividad y concepto unico. Cura di Mama ta combina arte, naturalesa y actividadnan educativo; Moorebida ta ofrece un residencia di bienestar di 14 dia enfoca riba descanso, reflexion y conexion cu naturalesa; mientras Piskechi Experience ta concentra riba eco-turismo, diving y educacion tocante proteccion di medio ambiente marino.

Como ganadornan, e tres negoshinan lo ricibi coaching strategico, sosten den marketing y branding y otro recurso pa fortalece nan concepto y visibilidad dentro di turismo di Aruba.