Informe Beke: Aruba tin 15 pa 16 gang hubenil activo

ORANJESTAD – Aruba tin entre 15 y 16 grupo hubenil (gang) cu regularmente ta aparece riba radar di Polis, Husticia y organisacionnan di asistencia. E gruponan aki ta varia entre grupo informal di caya y rednan criminal mas structura, den cual adulto ta usa mucha di 14 pa 18 aña pa ehecuta tarea relaciona cu droga, arma, robo y violencia.

Esaki ta uno di e conclusionnan mas alarmante den e informe “De schaduwkant van Aruba”, prepara pa Bureau Beke riba encargo di Ministerio Publico. E estudio ta basa riba analisis di datonan oficial, literatura, observacion den bario y 59 entrevista y combersacion cu profesionalnan den husticia, enseñansa, cuido y organisacionnan social.

Segun e investigadornan, e 15 pa 16 gruponan ta concentra principalmente den Pos Chiquito, Sabana Basora, Cayennastraat, Village, De Vuyst, Madiki, Dakota y Sero Patrishi. E informe no ta bisa cu tur mucha of hoben cu ta biba den e barionan menciona ta envolvi den criminalidad. Ta trata di grupo relativamente chikito, pero cu por eherce un influencia grandi riba otro hobennan den nan ambiente.

Beke ta distingui tres tipo di grupo. Tin grupo informal di caya, forma pa hobennan di e mesun bario of famia, cu ta pasa tempo hunto, huma marihuana y ocasionalmente comete delito chikito. Despues tin e gruponan problematical conoci como “Soldiers”, cu tin un identidad comun basa riba nomber, color, simbolo of bario, y cu ta relaciona cu pelea, atraco y benta di droga.

E categoria mas serio ta consisti di rednan criminal den cual lidernan adulto, entre 20 y 40 aña, ta uza miembro mas hoben como ehecutor. Segun e informe, e rednan aki ta activo den comercio di droga y arma, ladronicia y violencia.

Hobennan mes no necesariamente ta yama nan grupo un “gang”. Nan ta usa nomber manera Cayennastraat Soldiers, Village Soldiers of Pos Chiquito Crew. E gruponan ta identifica fuertemente cu nan bario y ta uza color, tattoo y hashtag riba social media pa mustra nan afiliacion.

Un analista di Polis a splica na e investigadornan cu autoridadnan ta evita usa e palabra “gang”, pasobra esaki por duna e gruponan mas status. Sinembargo, e propio resumen Papiamento inclui den e informe ta referi literalmente na “15-16 gang di hoben”.

RECLUTAMENTO TA CUMINSA NA 13 OF 14 AÑA

E aspecto cu ta causa mas preocupacion ta e edad na cual reclutamento ta cuminsa. Segun Bureau Beke, hobennan di apenas 13 of 14 aña ta wordo hala den e gruponan pa miembro mas grandi.

Na principio, nan ta haya tarea relativamente chikito: sirbi como mensahero, vigila un sitio, transporta of bende droga y observa movimiento di Polis. Despues, algun ta wordo usa pa comete atraco of otro delito mas serio.

E informe ta señala cu adulto deliberadamente por uza menor di edad pasobra nan ta spera cu un menor lo haya un castigo menos pisa of lo evita detencion. Esaki ta transforma e mucha no solamente den sospechoso, sino tambe den victima di explotacion criminal.

Relacionnan familiar ta hunga un rol importante. Tin grupo den cual tata, omo, ruman y primo ta forma parti di e mesun red. E resultado ta un patronchi intergeneracional den cual criminalidad ta pasa di un generacion pa otro.

DROGA, ARMA Y VIOLENCIA

Segun e profesionalnan entrevista, e gruponan ta relaciona cu benta di marihuana, cocaina y xtc; posesion y circulacion di arma di candela; pelea; atraco; ladronicia di auto; intimidacion y conflicto entre bario.

Social media ta aumenta e visibilidad y intensidad di e problema. Snapchat, Instagram y TikTok ta wordo usa pa menaza rival, mustra arma, construi reputacion y recluta miembro nobo. Pelea ta wordo filma y comparti online como un trofeo.

Rivalidad ta principalmente territorial. E informe ta menciona conflicto entre Village y Cayennastraat, Cayennastraat y Pos Chiquito, y Village y De Vuyst. Un conflicto cu ta cuminsa online of cu un discusion aparentemente chikito por escala pa violencia serio.

Beke ta señala cu arma di candela, hopi biaha proveniente di Venezuela, ta circula den algun di e gruponan. E combinacion di arma, droga y hobennan cu kier gana “respet” ta crea un situacion particularmente peligroso.

NO TIN EXPLOSION, PERO SI UN NUCLEO PELIGROSO

E informe no ta conclui cu Aruba ta enfrenta un explosion general di criminalidad hubenil. Segun e datonan analiza, ta trata mas bien di un grupo relativamente chikito pero persistente, principalmente homber entre 14 y 23 aña, cu ta combina violencia, droga y actividad criminal.

No obstante esaki, e impacto social ta grandi. Riba un isla chikito, un cantidad limita di persona por causa hopi inseguridad, conflicto y daño den varios bario.

E investigadornan ta conecta e problema cu pobresa, famianan cu un solo mayor, falta di supervision, abandono escolar, falta di actividad despues di scol y oportunidadnan limita riba mercado laboral. Pa algun hoben cu no ta sinti cu e ta pertenece na scol, trabao of sociedad, e grupo di caya ta ofrece identidad, proteccion y status.

ARUBA SA UNDA E PROBLEMA TA, PERO FALTA CONTINUIDAD

Bureau Beke ta conclui cu Polis, Ministerio Publico, Reclassering, Jeugdbescherming, KIA y Veiligheidshuis ta traha bou di presion pisa, cu falta structural di personal, recurso y financiamento.

E informe ta recomenda un Taskforce Jeugd & Gezin, un monitor hubenil periodico, mas capacidad pa cuido y acompañamento, y inversion den enseñansa, oportunidad di trabao, deporte y actividad sigur despues di scol. Represion dirigi contra luganan, gruponan y lidernan mas peligroso mester bai hunto cu prevencion.

E pregunta cu awor Gobierno y Husticia mester contesta no ta si Aruba tin un problema. E informe ya a identifica e gruponan, e barionan, e metodo di reclutamento y e factornan di riesgo.

E pregunta real ta: ki accion concreto a tuma desde cu autoridadnan a haya e informacion aki, y ken ta carga responsabilidad pa evita cu e proximo mucha di 13 aña bira e siguiente “soldier”?