Fondo di €360.000 habri pa fortalece salubridad na Aruba y otro islanan ABCSSS

ORANJESTAD - Organisacionnan na Aruba y otro islanan ABCSSS por aplica pa financiamento pa proyectonan destina pa fortalece organisacion di sistema di salubridad. E programa di ZonMw ta concentra riba mehora cooperacion, coordinacion, accesibilidad, calidad y eficiencia di cuido medico.

Institucionnan di salubridad, institucionnan educativo y organisacionnan sin fin di lucro por participa, individualmente of den asociacion. E solicitante principal mester ta estableci na Aruba, Bonaire, Curaçao, Sint Maarten, Statia of Saba.

E fondo total disponibel ta €360.000, cu un maximo di €60.000 pa cada proyecto y un duracion maximo di 24 luna. Por lo menos 75% di e presupuesto di cada proyecto mester wordo gasta den e islanan mes, pa asegura cu e financiamento realmente contribui na fortalecemento local di cuido.

Proyectonan por inclui innovacion den cuido, mehoracion di procesonan existente, cooperacion entre diferente sector y implementacion of ampliacion di modelonan y metodonan cu ya a proba nan valor. ZonMw ta preferi tambe proyectonan cu por beneficia gruponan vulnerabel, manera adulto mayor y refugiado.

E fecha limite pa entrega e solicitud completo ta 25 di augustus 2026, 8:00'or di mainta ora di Aruba. E decision final ta spera pa principio di februari 2027 y proyectonan selecciona ta programa pa cuminsa na mei 2027.